Lej û hêrişî Rojawayê Kurdistanî sero bê maben di herêmanê Cizîrê, Kobanê, Remelan, Efrîn û Helep dewam kenê. Şoreşê Rojawayê Kurdistanî sero siftera Tirkiye, rejîm, hûkûmetê heremî û Kurdê îxanetkar zey Ketiba Selhadîn, Ketiba Edîl, Azadî, Komale Kurdî el Îslamî û dewletê rojawa ê zey Ewrûpa û Emerîqa desteg danê çeteyan û Kurdan sero ambargo, katlîam û çinîkerden virazenê. Peyniya nê çeteyanê hêrişker di dewlet û hûkûmetê Tirkiye, Suudi Erebîstan, Katar û welatê rojawa estê. Nê quwetî pêriko wazenê Surî di dewleta El Kaîde bîro ronayayin. Nayra zî aseno ki enê dewlet, quwet û rejîmî nêwazenê Kurdî bibê wayirê jew statû, silasmane û kamî.Menga remezanî dî hêrişê ser Serêkanî û verxodana Kurdistanijan
Bi girêdanê El Kaîde bi nameyê Dewleta Îslam ê Iraq-Şam çeteyenê Cephet el Nûsra 16ê temûz ra, yanê 8ê menga remezanî ra hata ewro Rojawayê Kurdistanî sero jew lejo pêt û wahşeto gird esto. Nê çeteyan sifte hêrişê Serekanî kerd. Gorey planî Cephet el Nûsra waşt Serêkanî bigêrê bin kontrolê xo. Qandê coy kiştêra hetê Hesekê û kişta bînra hetê vaşûrê Rimelan heta xeta herêma Derîk û Cizîrê waşt pêro bigêrê destê xo û Kurdan tayayaran vejê. Raya ki en derg Serêkanî ra şina herêma Cizîrê û wûjara kewna Kobanê, (ki na ray nê herêman girêdana pê) lejê en veşî çorşmey na ray di vijyay. Nê wurdina herêma werte di sûka Til Edyad esta û xora him tiya destê çeteyan deyo û him zî çorşmey Til Ebyad dewê Kurdan estê. Qandê lej û kontrolê nê hîrê herêman zey stratejîk zaf mûhîmî. Yanê kam tiyayan bigêro o do nê lejî di serkewo. Qandê coy zî planê sifteyin Serêkanî sero bi. Lê plan û hêrişê Cephet el Nûsra ê Serêkanî nêtepişt. YPG û YPJ 48 saeta miyan di çetey Serekanî ra vetî teber. Wexto ki Kurdan Serekanî girot, werteyê herema Kobanî û Cizîrê Til Ebyad mend, xora tiya zî destê Cephet el Nûsra di bî îna wûja û corşmeyê ci di mehla û dewê ki Kurdî manenê dest bi katlîama kerd. Xora heme katlîamê ceteyan zî bahdê girotena Kurdan Serêkanî dima dest kerd ci.
Hewna çend sivilî destê çeteyan deyê nîno zanayen
Hêrişê Cephet el Nûsra ê en wahşî û ê en pêtî çayê ki destê YPG-YPJ niyê wûja di benê vêşî. Hêrişê ki 20-22ê Temûz di Til Ebyad û eynî wext herema Til Koçerî rê bî, îna tiyayan di Banê Kurdan (Komalê Kurdan) bi bombayana teqnay û weşnay. Cephetûl Ekrad yanê Cepheyê Kurdan verniya enê hêrişa vijyay û jew emîrî Dewleta Îslam ê Iraq-Şam tepişt. Nay dima çeteya nezdiyê 400 sey Kurdê sivîl remnay û hewna zî veşê înan ra jû haydarî çinya. Nînan ra tayê ki amey bî veradayin. Êki veredayê vanê înan rê mûameleyê zey êşkence, heqaret û zilmê xirab bibi. Vêşî caya hewna hêrişê çeteya bê maben devam kenê û milet wûjara bar (goç) kena. Hêrişî heta Girkê Legê, Kobanê, Efrîn, Tirbespîyê, Helep û Serekanî rê benê. Nê hêrişa vernî di zî Kurdan seferberî îlan kerd. YPG-YPJ, quwetê polês Asayiş, Cephetûl Ekrad û heme Kurdê sivîl weriştê pay û xo starkenê.
Çiyo ki nê çetey kenê girêdanê xo bi muslumanînya çinyo
Lejo ki hewna heta ewro dewam keno çeteya ra zaf kes ame kişten û nîna miyan di zafê ci komûtanê El Kaîdeyê. Çeteya no lej di vinîkerdenê girdî day. Nê çetey her çend kenê vinî hend benê har û metodê bol xirabî şiloxnenê. Xora adara 2011 ra lejê Surî rayo ki çeteyê ki welatanê bînan ra ardê Rojawa û êki ordûyê Azad miyan di îsanan remnenê, fîdye wazenê, tirayayin kenê, malanê milet kenê têmya û herg roj babet babet sûcê îsanî kenê. Kamerayan vernî di wahşeto ki virazenê kes nêşeno bewniyo û êki nê dîmenan biwînê nêşenê xo vîra bikerê. Xora mesaja çeteyan zî oyo ki kamî varniya înan bivijiyê, îna bitersanê û propagandaya xo îna rê bikerê. Ê qandê armancanê xo her medot şixlonenê û virazenê. Verdê hêriş û katlîama, camiyanê Til Hasil û Til Aran di îmananê Selefi fetva deyayê û vatê " Malê Kurdan û namûse Kurdan helalo". Nê fetvayan dima sînorê vakûrê Kurdistan mehlanê Til Ebyad û dewanê Kurdan rê bi sloganê "cîhat" her fin hêriş virazenê, sivîlan remnenê, sereyan qot kenê, îsana veşnenê û vanê "Allahûekber" tecawizê ceniyan kenê û dima kişenê. Enê heme çiyan bi nameyê binê maskeya Îslamiya virazenê. Kişta bîn ra ê emel kenê ki, bi nê kerdinana êdê şirê cinet. Emel dê înan di merg înan rê cînyo û heger ê no lejê "cîhad" di bîrê kişten êdê fina bîn bîrê dinya û do rihe înan do hewt (7) finî weş bo.
Kurdan sero katlîam beno û heme dinya bêveng maneno
31ê Temûz di girêdanê sûk û herêmê Helep tabûrê ordûyê Azad û çeteyê girêdanê El Kaîdeya piya hêrişê Kurdê Til Hasil û Til Aran kerd. Qeç û domanî, cenî û camerdî, kal û pîrî nezdiyê 70 Kurdê sivîl bi metodê wahşî amey qetil kerdin. 50 kes 31ê temûz di û 20 kes zî 1ê tebax di kişta înan ra katil bî. Kurdanê ki waştê xo lej ra bireynê û remayê, pey sîlahanê doçqa amey bî qetil kerdin. Nê katlîamê ki binê maskeyê îslamiya bî, qe jew welatê musluman û welatanê rojawa lanet nêkerd û veng nêvet. Him JDA (Jewbiyayenê Dewletê Amerîka) him JE (Jûbiyena Ewrûpa) him zî JM (Jewbiyayinê Miletan) pey bêvengiya xo desteg da katlîama. Xora destegê hûkûmet û dewleta Tirk Cephet el Nûsra rê eşkerayo. Nê bêvengî û îtîfaqanê nimiteya ser, komûtanê pêrokin ê YGP Sîpan Hemo eşkere kerd ki Kurdan sero jew komployo xori û tarîxî ê miyan netewî esto û eleqe ant bêvengiya dinyay ser. Sîpan Hemo ard ziwan û va: "Katlîamê Til Aran di îxanet esto û tay Kurdan zî nê çeteya miyan di ca giroto". Peyniya eşkereya xo di Sîpan Hemo va: "Armanc aya ki wertêyê Kurdan û Ereban lejo xori vejê".
Ambargoyo giran rojawayê Kurdistanî sero esto
Him hûkûmetê vaşûrê Kurdistanî, him welatê herêmî û him zî welatê bînî pêro piya Rojawayê Kurdistanî sero jew ambargoyê giran ramnenê. Xora rewnayo ki Tirkiye Kurdan sero sînor girot bi. Tirkiye, Kurdistanijê vakûrê Kurdistanî halîkariyê ki qandê Rojawa arêdayê, bi menganayo ki keberê sînoran verdi vindarnayê û pey naya ambargoyê xo diha kenê xori. Hûkûmetê Herêma Federal ê vaşûrê Kurdistanî menga gûlan ra heta werteyê menga tebax keberê sînor ê Sêmalka girot bi. Nêrazîbiyenê milet dima, tay rayverenê keberî mecbûr mendî êşkere bikerê ki kêber qandê halîkariyê îsanî akerdeyo. Lê dima na eşkera zî zûr vijyê ki kêber giroteyo û qe nê abiyayo. Nay ra zî asayê ki ambargoyê hûkûmetê vaşûrî eşkereyo. Bahdê nêrazîbiyanê Kurdan ser hûkûmetê vaşûr mecbûr mend 3 mengan dima 15ê tebax di kêberê Sêmelka akero. Bahdê akerdena kêberî dima nezdiyê 35 hezar kesî barê vaşûrê Kurdistanî kerd. Lê hewna qandê halîkarî kêber giroteyo, tenya qandê êki bar kenê rê akerdeyo. Bi naya diriyina vaşûr plan oyo k, Rojawa veng bimano. Hereketê TEV-DEM veynda heme mileta Rojawayê Kurdistanî û va: "Erdê xo terk mekerê". O wûnî aseno ki kêberê Sêmalkê sero do hewna zaf cî bîro kerdin. Hûkûmetê vaşûrê Kurdistanî wazeno ki Rojawa bibo veng û bê îsan bimano. Xora verê enê goçan, katlîamê ki Kurdan sero bîbî zî hûkûmetî ra qe jew veng nêvijya bi. Tenya vatê madê bewnê katlîam esto yan zî çînyo. Kişta bîn ra welat û dewletê miyan netewî zî Rojawayê Kurdistanî sero ambargoyê xo ramnenê. JM (Jewbiyayenê Miletan) menga temûz miyan di "pêrokinê Surî" rê nezdiyê 2,4 mîlyon îsana rê bişo bes bikero çerçeweyê Programê Werdin ê Dinyay (WFP) di hardimê ki rişt bî eşkere kerd. Lê nê hardimê ki rişnay Surî rê bes nêkerd û heremanê Surî miyan di Rojawa rê qe teba nêrişt bi. Verdê heme hêriş, ambargo û tengan Rojawayê Kurdistanî verxodano 16ê temûz ra heta ewro, siftera çeteyenê Cephet el Nûsra YGP-YPJ ra darbeyê girdî werdî. Miyanê ci di bi seyan çeteyê ki kokê ci welatanê teberîrayo û lejkerê çeteyan amey kişten. Bi desan cenazey (meyitî) kewtî destê YPG. YPG bi desan çetey esir girotî, tanq û wesayitê ki zerey ci bi sîlahanê doçka bîbî dest na ser. Her çend YPG roşanê remezanî di adirbirnayin eşkere kerd zî, grubê çeteyan goştar nêkerd, bin maskeyê Îslam di nêvindardî û nawber nêda hêrişanê xo. Nayser YGP verxodana xo verî ra diha kert berz û tekoşîn da. Xora verî zî seferberî qandê Rojawa est bî, lê dima na seferberî kewt miyanê pratîkî û her kam destê ci sîlah tepêşeno kewtî miyanê YPG û verê çeteya lej kerd.
Hedefê heme quwet, dewlet, rejîm û çeteyan oyo ki şoreşê Rojawa bifetisnê
Hedefê sifteyên oyo ki, heger Rojava pêro nêkewo destê El Kaîde o wext senî şenê Kobanê parçe bikerê û bigêrê bin kontrolê xo. Xora him qandê Kurdan him zî qandê Dewleta Îslam ê Iraq-Şam ebi Cephet el Nûsra çayo en mûhîm kişta siyasî, lejkerî, stratejî û coxrafî Kobanê yo. Ê wazenê Kobanê bikerê paytexta xo. Lê qandê nê hedefî gerek sifte Serêkanî bigêriyo. Seba girotena Serêkanî û heme Rojawayê Kurdistanî zî El Kaîde, Cephet el Nûsra, ordûyê Azad û çend quwetê îxanetkarê Kurd, Tirkiye di xeylî civînî viraştî bî, planî kerdî bî û peynî di zî heme kewtî miyanê îtîfaqan. En peynî 18ê tebax di zî ordûyê Tirk girêdanê sînorî bi topanê hawan Serêkanî bombevaran kerd. Eynî wext di çeteyê Cephet el Nûsra ravêrdî hetê vaşûrê Kurdistanî û wûjara hêrişê dewanê Kurdan êki nezdiyê sînoriyê kerd. Nay ra zî no îtîfakê lejî eskera beno. Zek ma siftera rind zanê ki nê çetey Tirkiye di arêbenê pêhet, perwerde vînenê, sîlahan genê û sînoran sera rihat şinê Rojawayê Kurdistanî û peyser yenê. Kişta bîn ra talûkeyê en gird ê nê quweta oyo ki bi hedef, armanc, plan, îtîfaq û hêrişa miyanê Kurdan û Ereban di jew lejê derg û xori vejê wertê. Xora KCK êşkere kerd ki: "Lejê Tunûs, Misir, Lîbya û Surî rawerdo Kurdistan û oyo yeno waşten ki lejê dinyay ê 3. (hîrêyin) Kurdistan di biramo. KCK vano: "Kederê quwetenê Modernîteyê Kapîtalîst û kederê quwetanê Modernîteyê Demokratîk girêdanê peyniya enê lej yo".
Şopa Rojawayê Kurdistanî sero xeta Modernîteya Demokratîk
Çimê heme dewlet û sîsteman 19ê Temûz 2012 ra heta ewro ser şoreşê Rojawayê Kurdistanî seroyo. Xora hegemonya kapîtalîst heme quwetê xo kerdê jew û nêveredanê bê sîstemê îna qe jû pratîgmaya bîn rojawa di bîro ronayin. Kapîtalîzma îktîdar zey JDE û JE statûya Kurdan zey planê ci Rojhilatê Mîyan sero pûç veto vînenê. Kiştê ra rejîmê bi statûkoyê dewlet netew zey Tirkiye û ê bînî qezencê Kurdan xorê talûke vînenê. Kişta bîn ra zî quwetê pey maskeyê îslam nêveradanê Kurdî bibê wayirê fîkrê zey demokrasiya zaf kultirî, îradeyo pêt û Xoseriya Demokratîk. Lê ver nê hemê sîstema tekoşîna azadiya Kurdistan wazena bi Xoseriya Demokratîk Rojawayê Kurdistanî di xeta 3. (hêrêyin) akê Rayverê Kurd Abullah Ocalan eskere kerda di demokrasiya miletan rono. Qandê nay zî, nê heme quwetî pêro biyê jew û hêrîşanê xo Kurdan sero kenê vêşî. Kurdistanijî zî nê raştiyan rind vînenê û zanê. Qandê coy zî heme Kurdistanijan seferberî îlan kerdo û wayirê soreşa Rojawa vijênê. Heger şoreşê Rojawa serkewo do Modernîteya Demokratîk bîro ronayin, lê heger vinîkerê do koletiya se seran biramo. Qandê azadî, demokrasî û biratî sifte heme ciwanê Kurdistan, dostê înan û quwetê Modernîteya Demokratîk gerek şoreşo ki Rojawayê Kurdistanî di beno, nêy het cayê xo bigêrê û kederê xo bi xo eşkerê bikerê.
Hiç yorum yok:
Yorum Gönder